गाम की कुरड़ी वो जोहड़ का पाणी

वो गाम की कुरड़ी वो जोहड़ का पाणी

ये सोफा भी ले लो, ये बेड भी ले लो -
मन्नैं दे दो वा सणी की खाट, वा पलंग
पुराणीये चादर भी ले ल्यो, या सौड़ भी ले ल्यो
मन्नैं दे दो वा खरड़ पुराणीबेशक
खोस ल्यो मेरे तैं या मेरी जवानी
पर मन्नैं दे दो उल्टे बचपन के चौमासे,

वो गाम की कुरड़ी वो जोहड़ का पाणी

कदे फिरणी पै थळियां पै जाणा
वो रूंढी-खूंढियां कै पाछै हांडणा
करड़े घाम में गाळां मैं दामी कहना
वे चिड़िया, वे मोर, वे म्हाळ तोड़ना
वो ऊंची फिरणी, वा बणी पुराणी

वो दादा का डोग्गा, दादी की पुचकारी
व टूटी साईकल, वा बुग्गी बिराणी
गाम की सब-तैं हेल्ली पुराणी

वे गोळी, बित्ती-डंडा आर् खुळिया खेलना
वे कुतिया ब्यावण पै पिल्यूर्यां पै लड़ना-झगड़ना
वो पीपळ पर तैं पड़ना, पड़ कै रिंडाणा

वे गन्डे पाड़-कै झीक-झीक चूसणावे कोल्हू,
वे कोल्हड़ी, वे ढाणे, वे बरौली
वा होक्कयां की गुड़-गुड़, वा बुळ्धां की टाल्ली

जोहड़ मैं बड़-कै रूंढी न्हुवाना
वो घरक्यां तैं लुक कै दाण्यां की चीज्जो ल्याणा
नाह किसै का रौळा, नाह किसै की चक-चक

नाह क्याहें का गम था, नाह क्याहें की चिन्ता
बड़ी कमाल थी वाह जिन्दगानी...
बेशक खोस ल्यो मेरे तैं या मेरी जवानी
पर मन्नैं दे दो उल्टे बचपन के चौमासे,
वो गाम की कुरड़ी वो जोहड़ का पाणी

सणी=सन जिस से चार पाई बुनते हे
सॊड=रजाई
खरड_ गाय भेसंओ के खाने ओर चारा चरने वाली जगह
कुरडी=जहा घर का गन्द फ़ेका जाता हे
जोह्ड=तालब
बाकी शव्दो का हमारा प्यारा ताऊ बतायेगा मतलब